حواديتنا للشاعرة سارة شلبي

sara shalby 13 مارس 2016 | 4:51 م شعر عامي 940

حواديت جدودنا زمان…بتقول كتير مواويل
بيلخصوا الأزمان….فى حكمه ليها دليل.
ويجرجروا الأيام….على أرض خضرا ونيل.
يامراكبى هات مجاديف تخبط على همى..
وصى اللى شايلين سيف…مايرخصوش دمى..
وما يوأدوش حلمى……
ده أنا حلمى لسه رضيع..يلمح ساعات خوفى
يشيخ فى روحه الأمل..ينشف معاه جوفى..
يافرح صوتى اتنبح…….ناديت عليك ياما..
لا حزنى شبحه اندبح…ولا بطلوا ملامه..
وانا ماشيه عمرى اتجرح..والدنيا دوامه
تشفى العليل م الهوا…فتدخله فى حاله..
يتوه ساعتها الدوا…وكأنها رساله..
دايره ما ليها بيبان….قدرك تعيش فيها..
لا صُبح منها يبان..ولا ليل يغطيها…
لا ليها شط أمان …ولا موج يرسيها.
حكمه وقالوها زمان…مواويلنا تحكيها..
ان كنت يوم طمعان..هتعيش فقير بيها.
دى الدنيا بر أمان…للى زهد فيها..