قصيدة “ترس” للشاعر أحمد شبكة

Ahmed shabaka 01 مارس 2016 | 1:10 ص شعر عامي 381

أنا كنت تِرس…
الاختلاف بيشقّقه
حاول زمانة يِعَشّقُه
قام عَشّقُه…
في الناس و ليلهم و الغناوي و القمر
عاشر بشر
و امّا اتحشر
كسّر سنون كل اللي سَجَنُه و صَدّقُة
و شَتّ عن كل التروس
حرّر خلاصات الدروس
و حلف يدوس
علي كل جرح و كل طوق
وعاش بدهشه و عاش بشوق
و برغم كل حموله… برضو نَطّ فوق
و نادىَ علي كل التروس المُحبَطة
يا كل مَتروس في الحياه
يا كل عشمان في الغطا
عيش و ارتعش
في مواجهة البرد الحزين
ماتخافش من بُطء الخُطا
ما تخافش من جَري السنين
و لا عَصرِة القلب البتول
و اصرخ و قول…
شهد البدايات في التعب
فشل التجارب كان سبب
للمعرفه
ثم الوصول
الاختيار مالهوش اصول
الاختيار محتاج جنون
ياتعيش مِعشّق ع الطريق
ياتعيش عشيق
من غير سنون
و انا كنت… ترس