كام لفة للشاعر مصطفى طه

مصطفى طه 13 مارس 2016 | 5:25 م شعر عامي 1٬572

وكام لفه ف كام لفه
وميت كفه
ومين عارف
ف اخر لفه
هتقرب اديك من مين
تقض العمر تتشابك
ف وسط الدنيا والعايشين
تقرب حبه وتجرب
تلاقى العمر بيسرب
ويفرز بُعد بنى ادمين
تعدى السكه بالسكه
توزع من السنين فكه
على كل اللى مش راجعين
وتحسب كوبايات الشاى
ومين بعد اما قال ازاى
لقيت اسمه مع الماشيين
فتكدب حبه و تعامل
ومين ف الدنيا دى كامل
يصنف تحت بند امين
بتبدأ عمر باللفه
وتكبر جوه كام لفه
تزيد مع كل بنى ادمين
فـ كام لفه فى كام لفه
ومية كفه
ياعالم لما تتعلق
بكفه
هترمى بيك على فين