مدد يا محروسة للشاعر أحمد شبكة

Ahmed shabaka 23 مارس 2016 | 4:46 ص شعر عامي 1٬695

مدد يا محروسة للشاعر أحمد شبكة

إسكندراني ..
لو إن الكلمة مهروسة
إسكندراني وجايلك
مدد يا محروسة
في الإيد دي بيرم
وإيدي التانية شيخ درويش
وكلام فـ قلبي نطق
اطلقني عاوز أعيش
مانتاش عجوز يا جدع
ولو إنه شَعر مافيش
تتعتّق الأحلام
زي النبيت تِغلي
الرّك بس إنها متموتش محبوسة
(بنقول هريسة هنا ومانقولش بسبوسة)
إسكندراني وجايلك
مدد يا محروسة
————-
إسكندراني..
وجايلك نظرة يا سيّدة
فكّي إيديّا وأفكاري اللي متقيّدة
واوصفيلي الطريق
يمين فـ تاني شمال؟
طب فيه فـ قلبي كلام
مستنّي يوم يتقال
مانتاش غريب يا جدع
ما كلّنا غُرَبا
لسّاك بترعش خجل
وبتنتشي طربا
امشي فـ دروبها وتوه
دي التوهة حنيّة
(بنقول فلافل هنا مانقولش طعمية)
إسكندراني وجايلك
مدد يا محميّة
————–
إسكندراني..
وجايلك اوعي ما تبصّيش
وآدي الزيارة سمك
وبسارية على شراغيش
أنا طالب القرب
لو ينفع تواربي الشيش
ومانيش حليوة
لكن قلبي ما بيساعنيش
مانتاش عويل يا جدع
دي العلّة أكل العيش
طأطأ ودانك وألّف م القصايد جيش
(بنقول على البحر مانقولشي على الكورنيش)
نويت أخطّي وكلامي يخلى م السوسة
إسكندراني وجايلك
مدد يا محروسة